საერთო ცხელი ხაზი +995 577 07 05 63
წინამდებარე კრებულში წარმოდგენილია კრიტიკული ტექსტების თარგმანები და საქართველოში ნაციონალიზმის და მოქალაქეობის თემაზე მომუშავე პროფესორებთან ჩაწერილი ინტერვიუების ციკლი. ტექსტები საქართველოში პოსტ-საბჭოთა ტრანზიციების კონტექსტში მიმდინარე პოლიტიკურ და სოციალურ ცვლილებებს და ამ ფონზე გაჩენილი ნაციონალური და ეთნიკური პოლიტიკის დილემებს აანალიზებს. წარმოდგენილი ტექსტები უახლესი ისტორიის მრავალშრიანი გაგებისთვის ნაყოფიერ თეორიულ ნიადაგს ქმნის და მის საინტერესო კონცეპტუალიზებასაც ახდენს.
90-იანი წლების შემდეგ, საქართველო ეთნო-პოლიტიკური კონტექსტის მქონე ხილული და უხილავი კონფლიქტებისა და დაძაბულობების ადგილი გახდა. სისტემის ნგრევა, ცენტრსა და პერიფერიებს შორის გაჩენილი უთანხმოებები და რთულად განჭვრეტადი საერთო მომავალი, დრამატული ეკონომიკური დაღმასვლა და სიღარიბე , რეპრესიული ეთნო-ნაციონალიზმი და უმცირესობების მიმართ დისკრიმინაციული პოლიტიკა ახალი სახელმწიფოს მშენებლობის გზაზე მნიშვნელოვანი გამოწვევა გახდა. ამ უახლოესი ისტორიის შეფასება შეუძლებელია საბჭოთა ნაციონალური პოლიტიკისა და მის მიერ ახალი იდენტობების წარმოების პროცესის, ასევე პოსტ-საბჭოთა პოლიტიკური და ეკონომიკური ტრანზიციების კრიტიკულ ანალიზის გარეშე. წარმოდგენილი ტექსტები სწორედ ამ პერსპექტივიდან ისტორიის და დღევანდელობის დანახვას ცდილობენ.
იმედი გვაქვს, რომ კრებულში წარმოდგენილი სტატიები და ინტერვიუები განსაკუთრებით საინტერესო იქნება სტუდენტებისთვის და მოქალაქეობის, ეთნიკურობის, რელიგიის თემაზე მომუშავე მკვლევრებისთვის.
თარგმანები:
- „ყველაფერი იყო მარადიული, სანამ არ დასრულდა“ - ალექსეი იურჩაკი;
- ორიენტალიზმის აჩრდილი ევროპაში: ეგზოტიკური სხვიდან სტიგმატიზებულ ძმამდე - მიხალ ბუხოვსკი;
- ოჯახური ქიშპობა: გენდერი, ნაციონალიზმი და ოჯახი - ენ მაკლინტოკი;
- ეროვნულობა და ნაციონალობის საკითხი საბჭოთა კავშირსა და მის მემკვიდრე ქვეყნებში: ინსტიტუციური თვალსაზრისი - როჯერს ბრუბეიკერი;
- მოქალაქეობის ეროზია - ბრაიან ს. ტერნერი;
- მოქალაქეობა და სოციალური კლასი - ტ.ჰ. მარშალი;
- საზღვრების წარმოება და საბჭოთა ეროვნული იდენტობების ჩამოყალიბება, ანა ჟვანიას მიმოხილვა;
- დროებითი მდგრადობები: იდენტობების პოლიტიკა პოსტ-საბჭოთა ევრაზიაში (1999 წ) - რონალდ გრიგორ სიუნი;
- მშობელი-სახელმწიფოდან ოჯახის პატრიარქებამდე: გენდერი და ერი თანამედროვე აღმოსავლეთ ევროპაში (1996 წ) - კატერინ ვერდერი;
ინტერვიუები:
- „მგრძნობადი საზოგადოებები“ და ეროვნული ნარატივები: საქართველო, რუსეთი, სომხეთი და უკრაინა - ინტერვიუ რონალდ გრიგორ სიუნისთან;
- დევნილობისა და ლტოლვილობის გამოცდილება საქართველოსა და უკრაინაში - ინტერვიუ ელიზაბეტ ქულენ დანთან;
- აჭარა, ისლამი, საზღვრები და ქართული ნაციონალიზმი - ინტერვიუ მათიას პელკმანსთან;
- მოქალაქეობა, მიკუთვნებულობა და უნდობლობა - ინტერვიუ ფლორიან მიულფრიდთან;
კრებულში შესული მასალების მომზადება შესაძლებელი გახდა შვეიცარიის, ჰაინრიჰ ბიოლის ფონდისა და RFSU-ს მხარდაჭერით მიმდინარე პროექტების ფარგლებში.
