დამოუკიდებელი და ობიექტური გამოძიების წარმოება, დიდი ხანია სისხლის სამართლის მართლმსაჯულების უმთავრეს გამოწვევას წარმოადგენს ქვეყანაში. მიკერძოება და მზარდი პოლიტიკური გავლენები პასუხისმგებელ უწყებებზე, საფუძველს აცლის საზოგადოების ნდობას გამოძიების პროცესზე.

პროცესის მიმართ ტოტალურ საზოგადოებრივ უნდობლობას, ბევრი ობიექტური მიზეზი აქვს. თუმცა, მთავარი პრობლემა მაინც, პოლიტიზირებული სისტემა და არასათანადო საკანონმდებლო გარანტიებია.

გამოძიების ობიექტურობას პირველ რიგში, ინსტიტუციური და ფუნქციური (ოპერაციული) დამოუკიდებლობა განსაზღვრავს. ინსტიტუციური დამოუკიდებლობა არა მხოლოდ გარეშე, პოლიტიკური გავლენებისგან დაცვისთვის არის მნიშვნელოვანი, არამედ იმისთვის, რომ დადგინდეს რომელი უწყებაა გამოძიების შედეგებზე სამართლებრივად და პოლიტიკურად პასუხისმგებელი. ფუნქციური დამოუკიდებლობა კი, პროცესის მიუკერძოებლობის, გამოძიების ობიექტურობის საფუძველია.

დამოუკიდებლობის კუთხით ძირითად პრობლემას ქმნის უფლებამოსილებების არასწორი, არაჯეროვანი გადანაწილება დევნის და გამოძიების ორგანოებს შორის, პროკურატურის ჭარბი საზედამხედველო მანდატი გამოძიებაზე.

გამოძიების შედეგებზე უწყებრივი პასუხისმგებლობისა და ფუნქციური დამოუკიდებლობის პრობლემა ნათლად გამოავლინა ე.წ. ხორავას ქუჩის საქმემ, რომლის შედეგებსაც მნიშვნელოვანი პოლიტიკური პროცესები მოჰყვა ქვეყანაში. თანამდებობა დატოვა გენერალურმა პროკურორმა,^[1] პარლამენტში შეიქმნა საგამოძიებო კომისია^[2], რომელმაც შედეგად მნიშვნელოვანი სისტემური პრობლემები გამოავლინა.^[3] შეიძლება ითქვას, რომ ეს იყო პრეცედენტი, რომლის საფუძველზეც სახელმწიფომ პირველად, გაცხადებულად დაიწყო მუშაობა საგამოძიებო სისტემის რეფორმაზე.^[4] 

რეფორმაზე მუშაობა შინაგან საქმეთა სამინისტროს ხელმძღვანელობით დაიწყო. საწყის ეტაპებზე პროცესში აქტიურად იყო ჩართული სამოქალაქო სექტორიც^[5]. უწყება ღიად თანამშრომლობდა დაინტერესებულ მხარეებთან და  სამოქალაქო სექტორის არა ერთი წინადადება გაიზიარა. შემუშავდა რეფორმის კონცეფცია^[6], რომელიც შემდგომ ვენეციის კომისიამაც შეაფასა^[7]. მოგვიანებით, სამინისტროს მენეჯმენტის ცვლილების ფონზე, კი სამუშაო პროცესი მეტნაკლებად დაიხურა და სამოქალაქო სექტორიც დისტანცირდა ამ პროცესისგან. თუმცა, სამინისტროს ოფიციალური განცხადებით, კანონპროექტი მზად არის და მიმდინარეობს ძირითადი საკითხების  შეთანხმება უწყებებთან^[8].

საკითხის მნიშვნელობას ისიც უსვამს ხაზს, რომ გამოძიების დამოუკიდებლობის ხარისხის ამაღლება, თითქმის ყველა წამყვანი პოლიტიკური ჯგუფის საარჩევნო პროგრამის ნაწილი გახდა.^[9] რეფორმის გატარებაზე პოლიტიკური პასუხისმგებლობა აიღო მათ შორის მმართველმა პარტიამაც.^[10]

^{სტატია სრულად შეგიძლიათ იხ. მიმაგრებულ დოკუმენტში}