EMC გთავაზობთ ფოტოპროექტს - "ხმა რიონის ხეობიდან", რომლითაც გაგაცნობთ ნამახვანი ჰესის მოწინააღმდეგე აქტივისტებს, რიონის ხეობის მაცხოვრებლებს, რომლებიც უკვე რამდენიმე თვეა, დაუღალავად იბრძვიან საკუთარი ხეობის გადასარჩენად.1

• კახა ასათიანი

"ქუთაისში დავიბადე და გავიზარდე, მაგრამ აქეთ, სოფელში დიდი დრო მაქვს გატარებული. ახლა დედაჩემიც უკვე აქეთ გადმოვიდა. ამ ჰესზე მოსახლეობა გაყოფილია - ზოგს უნდა, რომ დათმოს თავისი ადგილი კომპენსაციის სანაცვლოდ, მაგრამ მომავალს არ უფიქრდება. ალბათ, გაჭირვებამ მიიყვანა ეს ხალხი აქამდე".

"არადა, მარტო ესე ხომ არ არის, რომ ადგე და წახვიდე. დიდ ზიანს მიაყენებს ჰესი აქაურობას. ჯერ მარტო ტვიშის მიკროზონა შეიცვლება აქ, განადგურდება, და ვაზის უნიკალური ჯიში აღარ გვექნება. არ არსებობს შესაბამისი წინასწარი დასკვნები, რაც აუცილებელია. ამათ ჯერ მშენებლობა დაიწყეს და შემდეგ გზაში უნდა დააწიონ ეს დასკვნები. ვთქვათ, მერე გავიგეთ, რომ, თურმე, არ შეიძლებოდა ამ მშენებლობის დაწყება. მანამდე რომ აქაურობას ააოხრებენ, ამაზე პასუხისმგებელი ვინაა? ახლა უბრალოდ დროს იგებენ. რაც აწყობთ, იმას აკეთებენ".

"შარშან ბებია გარდაიცვალა, რომელიც შემიძლია ვთქვა, რომ ამ პროექტზე ნერვიულობას შეეწირა. ამაზე საუბარი ჯერ კიდევ წინა ხელისუფლებისას იყო. 2012-ში ვიფიქრეთ, რომ გვეშველებოდა რაღაც - პირდაპირ ამბობდნენ, დიდი ჰესები არ აშენდებოდაო - მაგრამ, როგორც ხედავთ, იგივე გააგრძელეს".

• მარიტა მუსელიანი

"ტვიშში ოჯახური მეურნეობა გვაქ, რომელსაც მეუღლესთან და შვილთან ერთად ვუძღვები. გვინდა, რომ დარჩენილი ცხოვრება ამ მეურნეობას მივუძღვნათ. ტვიშის და კიდე ოცდარვა სოფლის მღვდელია ჩემი მეუღლე. სოფელში მის მსახურებასთან დაკავშირებით დავსახლდით".

"ჰესი მეურნეობასთანაც შეუთავსებელია და ზოგადად, ამ კუთხისთვის წარმოუდგენელი ამბავია. რასაც ხედავთ ახლა, გარშემო, წყალში ჩაიყრება. ჰესი რომ უნდოდეს ჯანსაღი აზროვნების ადამიანს, შეუძლებელი ამბავია. ამხელა ინფრასტრუქტურული ცვლილება, ბუნების მოსპობა, ისტორიულ და კულტურულ ძეგლებზე რომ არაფერი ვთქვა - ეს წარმოუდგენელი ამბავია. უსამართლობის განცდა რომ არის სახელმწიფოში, მერე რაღაცნაირად ეს ადამიანების აზრებზეც აისახება. უიმედობის განცდის გამო ხალხი ფიქრობს, რომ ხელისუფლებას როგორც უნდა, მაინც ისე გააკეთებსო. ეს მომენტია გადამწყვეტი. თვლიან, რომ პატარა წინააღმდეგობები ამ საქმეში ჩაიკარგება. ჩვენ ვცდილობთ, რომ ეს პატარა წინააღმდეგობები გავაერთიანოთ და რაღაც გარკვეულ შედეგს მივაღწიოთ".

• ლეილა ნაკვეხელიანი

"18 წელია ამ მაღაზიაში ვმუშაობ. სახლიც აქვე მაქვს, გვერდით. ხან აქეთ ვრჩები, ხან - გუმათჰესი რო არის ქვევით, იქაც მაქვს სახლი, ერთ კილომეტრში. რომ გამოაღებთ კარადის კარებს, ყველაფერი დანესტილია. ჰესი თუ აშენდა, კლიმატიც შეიცვლება, ხალხიც დაავადდება აქ და ყველაფერი უბედურება იქნება".

"უნდათ ახლა შემოვიდნენ ტვიშში და გვპირდებიან, რომ თაფლს გაგაყიდინებთ, გზას გავაკეთებთ, ქარხანას გავაკეთებთო... ამით უნდათ ახლა, რომ ხალხი დაითანხმონ. ხო ხედავთ, დღეს, აგერ, რა ამბავი იყო? ორხში ყოფილან, მოსახლეობას ეუბნებოდნენ, თაფლს ვიყიდით თქვენგანო. ასე უნდოდათ ხალხის მოტყუება".

"ძალიან ბევრი ადამიანი არის ამ ჰესის წინააღმდეგ, მარა მაინც არ გვეშვებიან".

• მერაბ ნემსიწვერიძე

"მე და ჩემი შვილი ქალაქში ვცხოვრობდით, ქუთაისში, მაგრამ მოვბრუნდით სოფელში, დამიდგა გვერდში და დავუდექი გვერდში და ერთადერთი შემოსავალი ჩვენი ოჯახის არი ყურძენი და ვენახი. ვარსებობთ ამითი და ძალიან კარგი შედეგი გვაქვს. აი, ეს ჩვენი ვაზია. გვინდა, კიდევ მრავალი ვენახის დარგვა, გამრავლება და ყველაფერი რომ კარგად იქნება, ჩვენც კარგად ვიქნებით და სხვაც. მაგრამ აქ ერთი ძირითადი პრობლემა გვაქვს, რომ შენდება ნამოხვანჰესი, რომელიც დაგვაზიანებს ძალიან".

"რაღაცა საშველი დაგვაყენონ, თორემ აქ ცხოვრება აღარ შეიძლება. იქნება ასეთი ნისლები, იქნება ტენიანობა, იქნება ზამთარი ცივი, ქარი და მიკროკლიმატიც, რომლითაც ჩვენი სოფელია განთქმული და საუკეთესო ღვინო მოდის მთელ საქართველოში, ეს ყველაფერი დაიკარგება. გადაღმა, ცაგერის რაიონიც დაზარალდება. ხვანჭკარა რომ არის, იმასაც დააზიანებს. რას გვიპირებენ მერე, ნეტა ვიცოდე... ეს ყველაფერი თუ დაიკარგა, მერე რაღა არის ჩვენი ოცნება, ფიქრი და რაზე უნდა ვიმუშაოთ და რა უნდა გავაკეთოთ. ვთხოვთ ჩვენს მთავრობას, რომ შეწყვიტოს ამ ურჩხულის აშენება.

"მერე მეორე კიდე - მართლა რომ გაყუჩებულა ის ქუთაისი, გურია და სამეგრელო, ამოიღონ ხმა, თორემ რომ რამე მოხდეს, ამბის მთქმელი კი არა, ნათესავი არ დარჩებათ, რა მოხდა, ამბავი რომ მიუტანონ".

• ბექა ლაჭყებიანი

"მე მევენახე-მეღვინე ვარ ტვიშიდან. მთელი ჩემი შესაძლებლობა ამ საქმეში მაქვს ჩადებული. ოჯახის ტრადიციებზე დაფუძნებულ ღვინოს ვქმნით და მეურნეობას ვავითარებთ. ხმამაღლა მინდა ვთქვა, რომ ამ ჰესის ამშენებლები დიდ შეცდომას უშვებენ. უკვე ორმოცდაათ დღეზე მეტია, რაც რიონის ხეობის მაცხოვრებლები ამ ადგილას ვდგავართ. აკვიატებული აზრი კი არ გვაქვს რამე, უბრალოდ ამ ხეობის ფიზიკურად დატოვება არ გვინდა, რაც ასე უეჭველად მოგვიწევს. ამას არასდროს არ შევეგუებით. ამ მშენებლობას არასდროს დავეთანხმებით.

"საერთოდ, ეს საკითხი ზოგადად საქართველოს პრობლემაა. ჩვენი არშემდგარი მთავრობა ისეთ გადაწყვეტილებებს იღებს, რომლებიც კოლხეთის დაბლობსაც საფრთხეს უქმნის. აქ იმიტომ კი არ ვდგავართ ამ ყინვაში და წვიმაში, რომ სახლიდან გამოგდებულები ვართ ან სხვაგან წასასვლელი არ გვაქვს... არა... ყველას ყველაფერი გვაქ ჩვენ-ჩვენი სამყოფი და დაგვანებონ თავი, ეგ გვინდა რა.

"ადგნენ, პასუხისმგებლობა აიღონ და კონკრეტული ნაბიჯები გადადგან ამ საკითხთან დაკავშირებით. გული გვინდა რო საგულეში გვქონდეს და მამა-პაპის მიწაზე უარის თქმა რო არ მოგვიწიოს. სიცოცხლის იქით რისი მიცემის შესაძლებლობაც არა გაქვთ, ის გინდათ რო წაართვათ ხალხს? მასე არაა და არ შევეგუებით. ჩვენ არა ვართ აქ ოცი კაცი, ასი კაცი და თუნდაც ათიათასი კაცი. ჩვენ ვართ მთელი საქართველო. აუცილებლად სიმართლე გაიმარჯვებს და სიმართლე ჩვენ მხარეზეა".

გაზიარება