2018 წლის ოქტომბრიდან, სოციალური სამართლიანობის ცენტრი პარტნიორ ორგანიზაციებთან - „პარტნიორობა ადამიანის უფლებებისათვის“ (PHR), „საქართველოს სოციალურ მუშაკთა ასოციაცია“ (GASW) და „გლობალური ინიციატივა ფსიქიატრიაში - თბილისი“ (GIP – Tbilisi) - ერთად ახორციელებს პროექტს - „ქმედუნარიანობის ინსტიტუტის დანერგვის ხელშეწყობა საქართველოში“.

პროექტი დაფინანსებულია ღია საზოგადოების პოლიტიკის ცენტრის (Open Society Policy Center) მიერ და მისი მთავარი მიზანია ქმედუნარიანობის რეფორმის იმპლემენტაციისა და საზოგადოებრივ ცხოვრებაში ფსიქოსოციალური და ინტელექტუალური ნიშნით შეზღუდული შესაძლებლობის მქონე პირთა ჩართვის ხელშეწყობა.  

პროექტის ფარგლებში აქტივობები სამი ძირითადი მიმართულებით განხორციელდება:

• ქმედუნარიანობის რეფორმის იმპლემენტაციის ხელშეწყობა სამართლებრივი და პრაქტიკული ბარიერების აღმოფხვრის გზით. მიმართულება გულისხმობს ისეთი აქტივობების განხორციელებას, როგორიცაა: ქმედუნარიანობის რეფორმის იმპლემენტაციის კონცეფციის დოკუმენტის შექმნა, სტრატეგიული სამართალწარმოების განხორციელება, რეგიონებში ადგილობრივ შეზღუდული შესაძლებლობის მქონე პირებთან შეხვედრების გამართვა, სახელმწიფო სპეციალიზებულ დაწესებულებებში განთავსებულ ფსიქოსოციალური და ინტელექტუალური ნიშნით შეზღუდული შესაძლებლობის მქონე პირთა ცალკეული უფლებრივი ასპექტების კვლევა.
• ფსიქოსოციალური და ინტელექტუალური ნიშნით შეზღუდული შესაძლებლობის მქონე პირთა თემის წარმომადგენლების, მათი ოჯახის წევრებისა და მხარდამჭერების გაძლიერება, რაც, მათ შორის, გულისხმობს სპეციალური მოდულების შემუშავებასა და მათთვის ტრენინგების ჩატარებას, ასევე, დისკუსიისა და ადვოკატირების პლატფორმის ჩამოყალიბებასა და ფუნქციონირებას.
• საზოგადოების დამოკიდებულებების ცვლილების ხელშეწყობა ფსიქოსოციალური და ინტელექტუალური ნიშნით შეზღუდული შესაძლებლობის მქონე პირთა და მათ წინაშე არსებული გამოწვევების ხილვადობის გაზრდის მეშვეობით. აღნიშნული მიმართულება, მოიცავს ტრენინგების გამართვას ჟურნალისტებისათვის, მედია პლატფორმისა და მედიაპროდუქტების შექმნას, ასევე, საჯარო დისკუსიების ჩატარებას.

პროექტში განსაკუთრებით ხაზგასმულია შესაბამისი აქტივობების განხორციელებისას შეზღუდული შესაძლებლობის მქონე პირთა თემის წარმომადგენლების ჩართულობის (როგორც პრაქტიკანტების, ისე კონსულტანტების სახით) აუცილებლობა. პროექტის განმახორციელებელი გუნდი ასევე მჭიდროდ ითანამშრომლებს საკითხზე მომუშავე ადგილობრივ არასამთავრობო ორგანიზაციებთან და საერთაშორისო ექსპერტთან.

გაზიარება