[Skip to Content]
ENG
ENG

სიახლეების გამოწერა

კრიტიკული პოლიტიკის პლატფორმა

                                                      

სოციალური სამართლიანობის ცენტრი აცხადებს მიღებას კრიტიკული პოლიტიკის პლატფორმის წევრების შესარჩევად. მონაწილეობის მიღება შეუძლიათ ახალგაზრდა აქტივისტებს და მკვლევრებს, რომლებსაც სურთ გაიღრმავონ ცოდნა ეკონომიკური, პოლიტიკური და კულტურული წესრიგის შესახებ, იფიქრონ უფრო სამართლიანი, ინკლუზიური და თანასწორი საზოგადოების შექმნის გზებზე და ჩაერთონ აქტივიზმში.

კონცეფცია

კრიტიკული პოლიტიკის პლატფორმა სოციალური სამართლიანობის ცენტრის მიერ ორგანიზებული აკადემიური და პოლიტიკური პლატფორმაა, რომელიც მიზნად ისახავს სოციალური სამართლიანობით, არსებული ეკონომიკური წესრიგის ანალიზით, ეკოლოგიით, ქვიარ და ფემინისტური პოლიტიკით დაინტერესებული ახალგაზრდა აქტივისტებისა და მკვლევარებისთვის კრიტიკული თეორიული ცოდნის გაღრმავებისა და კოლექტიური მსჯელობის სივრცის შექმნას. პლატფორმის ფოკუსს ასევე წარმოადგენს  მონაწილეების ურთიერთგაძლიერების, შეკავშირებისა და საერთო მოქმედების გზების ძიება.

კრიტიკული პოლიტიკის პლატფორმა საშუალებას მისცემს მონაწილეებს იფიქრონ და იმსჯელონ გლობალური და ადგილობრივი პოლიტიკური მდგომარეობის კონტექსტუალიზებაზე, სოციალური, ეკონომიკური და კულტურული კრიზისების გამომწვევ მიზეზებზე, გამოავლინონ და მოიხელთონ ძალაუფლების სხვადასხვა ღერძი და მჩაგვრელობითი წყარო, ეძიონ მჩაგვრელობით სისტემებთან შეწინააღმდეგების ხერხები. აქტივიზმის ადგილობრივი პრაქტიკები ხშირად ვერ ახერხებს ავთენტური, ინკლუზიური და სამართლიანი დღის წესრიგის შექმნას, რომელიც ადგილობრივ კონტექსტს და რეალურ საჭიროებებს დაეფუძნება. პლატფორმა მიზნად ისახავს ამ ხარვეზის შევსებას და ახალი ტიპის კრიტიკისა და მოქმედებების გაჩენის ხელშეწყობას.

კრიტიკული პოლიტიკის პლატფორმა

პლატფორმის ფარგლებში, წინასწარ მომზადებული სილაბუსის საფუძველზე, ჩატარდება 20 თეორიული ლექცია/დისკუსია სოციალური, პოლიტიკური და ჰუმანიტარული მეცნიერებებიდან, რომლებსაც გაუძღვებიან შესაბამისი გამოცდილების მქონე პირები აკადემიური სივრციდან და აქტივისტური წრეებიდან. პლატფორმის მონაწილეების საჭიროებების გათვალისწინებით, ასევე დაიგეგმება სემინარების ციკლი კოლექტიური მობილიზაციის, სოციალური ცვლილებებისთვის ბრძოლის სტრატეგიებსა და ინსტრუმენტებზე.

ფორმატი:

  • თეორიული ლექცია/დისკუსია
  • შერჩეული წიგნის/სტატიის კითხვის წრე
  • პრაქტიკული სემინარები (მობილიზაცია, ორგანიზება, მეთოდები და ინსტრუმენტები)

ტექნიკური დეტალები:

  • მონაწილეთა მაქსიმალური რაოდენობა: 15-20
    ლექციების რაოდენობა: 20 (თვეში 4)
    სალექციო დროის ხანგრძლივობა:  2 საათი
    ლექციათა ციკლის ხანგრძლივობა: 5 თვე (სექტემბერი-იანვარი)
    ლექციების ჩატარების ძირითადი ადგილი: შერეული (ეპიდემიოლოგიური მდგომარეობის გათვალისწინებით)

მონაწილეთა შერჩევა:

პლატფორმაში მონაწილეობის მსურველებმა უნდა შეავსონ სააპლიკაციო ფორმა 

სკოლაში მონაწილეობის შესაძლებლობა ექნებათ უმაღლესი განათლების მქონე (ან დამასრულებელ კურსზე მყოფ) 21 წლიდან 35 წლამდე ასაკის სტუდენტებს, ახალგაზრდა აქტივისტებსა და მკვლევრებს. პლატფორმის მონაწილეები უნდა დაესწრონ სალექციო საათების სულ მცირე 80%-ს.

კრიტიკული პოლიტიკის პლატფორმაში მონაწილეობის მისაღებად შევსებული სააპლიკაციო ფორმის გამოგზავნის ბოლო ვადაა 2021 წლის 16 სექტემბერი

სააპლიკაციო ფორმა გამოგზავნეთ შემდეგ მისამართზე:  [email protected] 

  • გთხოვთ, იმეილის subject ველში მიუთითოთ „კრიტიკული პოლიტიკის პლატფორმა“.

სოციალური სამართლიანობის ცენტრი დაუკავშირდება მხოლოდ შერჩეულ კანდიდატებს, რომლებიც გაივლიან კონკურსის შემდეგ ეტაპებს.

დამატებითი ინფორმაციისთვის ან კითხვების არსებობის შემთხვევაში შეგიძლიათ მოგვმართოთ:

კრიტიკული პოლიტიკის პლატფორმის ორგანიზება ხორციელდება სქესობრივი განათლების შვედური ასოციაციის (RFSU) ფინანსური მხარდაჭერით.

უფლება საცხოვრებელზე / ფოტო

შეხვედრა ოქროს უბნის მოსახლეობასთან - ოჯახები გამოსახლების რისკის ქვეშ

სალომე ლაცაბიძე 

გასულ კვირას EMC-ს წარმომადგენლები ჩუღურეთში - “ოქროს უბანში” - იმ შენობაში წლობით მცხოვრებ ოჯახებს შეხვდნენ, რომელიც ამჟამად ბიზნესმენ თემურ უგულავას კომპანია “სითი ლოფტს” ეკუთვნის.

ჩუბინაშვილის, ფოცხვერაშვილის, კონსტიტუციისა და ნინოშვილის ქუჩების კვეთაზე მდებარე შენობა-ნაგებობაში 15-მდე ოჯახი ცხოვრობს - ეს მათი ერთადერთი საცხოვრისია. ოჯახების ნაწილი დევნილია, ნაწილი კი - სოციალურად დაუცველი. უმეტესი მათგანისთვის ერთადერთი სტაბილური შემოსავალი სოციალური შემწეობა და სხვადასხვა სოციალური პაკეტია (დევნილებისთვის, შშმ პირებისთვის განკუთვნილი).

უსახლკარობის და საცხოვრისის სერვისების არასაკმარისობის გამო, მათ თვითდახმარების მიზნით თავი შეაფარეს ამ შენობა-ნაგებობას, რომელიც მუნიციპალიტეტის საკუთრებაში (შენიშვნა: 2020 წელს ეს ტერიტორია მუნიციპალიტეტმა სახელმწიფო ქონების ეროვნულ სააგენტოს გადასცა) ირიცხებოდა. “ოქროს უბნის” მოცემულ მონაკვეთში ადამიანები წლებია, ზოგიერთ შემთხვევაში, 10-12 წელზე მეტია, რაც ცხოვრობენ. Ამ დროის განმავლობაში ისინი ცენტრალურ და ადგილობრივ ხელისუფლებას სთხოვდნენ საცხოვრისების დაკანონებას ან/და ალტერნატიული საცხოვრისით/კომპენსაციით უზრუნველყოფას, თუმცა უშედეგოდ. მიუხედავად ამისა, ისინი არ გრძნობდნენ ტერიტორიიდან გამოსახლების საფრთხეს, პირიქით, მუნიციპალიტეტი მათ კომუნალური სერვისების შემოყვანასა და გამართვაში დაეხმარა.

“ოქროს უბნის” მაცხოვრებლებს გამოსახლებისა და უსახლკარობის საფრთხე 2020 წლის ბოლოს დაემუქრათ, როდესაც სახელმწიფო ქონების ეროვნულმა სააგენტომ ტერიტორია სიმბოლურ ფასად „სითი ლოფტს“ საკუთრებაში გადასცა. მედიაში გავრცელებული ინფორმაციით, ამ საცხოვრისების ადგილას კერძო მესაკუთრის მიერ მულტიფუნქციური სივრცის მოწყობა იგეგმება.

ადგილობრივი მაცხოვრებლების თქმით, ტერიტორიის კერძო საკუთრებაში გადაცემის შემდგომ მუნიციპალიტეტი მათ დაუკავშირდა და საცხოვრისების უმოკლეს ვადაში დაცლა მოსთხოვა. გამგეობამ ოჯახების ნაწილთან დაიწყო მოლაპარაკებები, რომლებიც, თავის მხრივ, თანახმანი არიან, სათანადო კომპენსაციის სანაცვლოდ დატოვონ საცხოვრებელი. ადგილობრივების მიერ მოწოდებული ინფორმაციით, ამგვარი მოლაპარაკებები ძირითადად სოციალურად დაუცველ ოჯახებთან მიმდინარეობს, ხოლო რამდენიმე დევნილ ოჯახთან კომპენსაციის ან განსახლების თაობაზე კომუნიკაცია არ შემდგარა და ისინი გამოსახლებისა და უსახლკარობის რეალური რისკის წინაშე დგანან.

მოლაპარაკებების პროცესში თავდაპირველად მუნიციპალიტეტმა შინამეურნეობების ნაწილს საცხოვრისის დაცლის სანაცვლოდ, ბინის ქირა (300 ლარის ოდენობით) ან კომპენსაცია (საშუალოდ 15 000 ლარი) შესთავაზა. მაცხოვრებლების ნაწილის თქმით, გაზრდილი კომპენსაციის სანაცვლოდ ტერიტორიის დატოვების შესახებ მუნიციპალიტეტთან შეთანხმება შედგა. თუმცა, ოჯახები არ არიან დარწმუნებულები, იქნება თუ არა მათთვის გადაცემული თანხა საკმარისი გონივრულ ვადაში ალტერნატიული საცხოვრებელი ფართის მოსაძიებლად.

თუმცა, ამ შენობაში მცხოვრებ რამდენიმე დევნილ ოჯახთან საერთოდ არ წარმართულა მოლაპარაკებები. ამის მიზეზად სახელმწიფო სხვადასხვა დროს მათ მიერ საცხოვრისის ან კომპენსაციის მიღებას ასახელებს, თუმცა უგულებელყოფს იმ ფაქტს, რომ ამჟამად ეს ადამიანები უსახლკაროები არიან და საცხოვრისი სჭირდებათ. მაგალითისთვის, ერთ-ერთმა დევნილმა ოჯახმა მთავრობისგან მიღებული საცხოვრებელი ჯანდაცვის ხარჯების დასაფარად აღებული იპოთეკური სესხის გამო დაკარგა. ალტერნატიული გამოსავლის შეთავაზების ნაცვლად, სახელმწიფო მათგან მხოლოდ საცხოვრებლის დატოვებას მოითხოვს, მიუხედავად იმისა, რომ ამ ოჯახებს წასასვლელი არსად აქვთ. შესაბამისად, რამდენიმე დევნილი ოჯახი გამოსახლებისა და ქუჩაში დარჩენის რეალური საფრთხის წინაშე რჩება.

ინსტრუქცია

  • საიტზე წინ მოძრაობისთვის უნდა გამოიყენოთ ღილაკი „tab“
  • უკან დასაბრუნებლად გამოიყენება ღილაკები „shift+tab“