გუშინ, 16 სექტემბერს თბილისის საქალაქო სასამართლომ 4 წლიანი პატიმრობა შეუფარდა „რუსული კანონის“ საწინააღმდეგო აქციაზე დაკავებულ გიორგი შანიძეს (შანოს).1 ეს გადაწყვეტილება წარმოადგენს სამაგალითო დასჯას პოლიტიკური აქტივიზმისთვის, რა დროსაც სასამართლო და პროკურატურა შერჩევითად იყენებს არსებულ მკაცრ კანონმდებლობას.

გიორგი შანიძეს სისხლის სამართლის კოდექსის ორი მუხლით ჰქონდა ბრალი წარდგენილი. ესენია: 187-ე მუხლის პირველი ნაწილი, რაც სხვისი ნივთის დაზიანებას გულისხმობს და 265-ე მუხლის მეორე ნაწილი - დიდი ოდენობით ნარკოტიკული საშუალების შემცველი მცენარის მოყვანა. 16 სექტემბერს სასამართლომ სწორედ ნარკოტიკულ დანაშაულზე გამოიტანა განაჩენი. უფრო კონკრეტულად, შანიძეს აღნიშნული ბრალდება 3 ძირი მცენარე კანაფის მოყვანისთვის ჰქონდა წაყენებული, რაც პოლიციამ მისი საცხოვრებელი სახლის ჩხრეკის დროს ამოიღო.

ნიშანდობლივია, რომ ორივე დანაშაულზე, რომელზეც გიორგი შანიძეს ბრალი აქვს წაყენებული, პროკურატურა და სასამართლო სხვა შემთხვევებში, როგორც წესი, საპროცესო შეთანხმების მექანიზმსა და არასაპატიმრო სასჯელებს იყენებს. ეს ტენდენცია განსაკუთრებით თვალსაჩინოა ნარკოტიკული საშუალების შემცველი მცენარის კულტივირებაზე (სსკ-ის 265-ე მუხლის მე-2 ნაწილი). შედარებისთვის, გასულ წელს ამ მუხლით განხილული საქმეების 99%-ზე მეტი (242-დან 240) საპროცესო შეთანხმებით დასრულდა. 2

ეს სტატისტიკა ადასტურებს, რომ გიორგი შანიძესთან სავარაუდოდ იმიტომ არ გაფორმდა საპროცესო შეთანხმება, რომ ის მონაწილეობას იღებდა ანტისახელისუფლებო დემონსტრაციებში. მის მიმართ გამოტანილი განაჩენი ცალსახად წარმოადგენს მართლმსაჯულების პოლიტიკური ინსტრუმენტალიზების მაგალითს, რა დროსაც, ხელისუფლებისთვის არასასურველი მოქალაქე განსაკუთრებული სიმკაცრით ისჯება. ეს საქმე ამავდროულად არის დასტური, თუ რამდენად ძლიერია პროკურატურის პოლიტიზირება და როგორი შერჩევითი შეიძლება იყოს ამ უწყების საქმიანობა. ნიშანდობლივია, რომ ხელისუფლება ამგვარი შურისძიებისთვის სწორედ ნარკოტიკულ დანაშაულს იყენებს, რომელიც წლებია უსამართლო, არაპროპორციულად მკაცრი სასჯელების ერთ-ერთი უმთავრესი სიმბოლოა და რომლის რეფორმირებაზე „ქართული ოცნება“ თავად აკეთებდა პოლიტიკურ დაპირებებს ხელისუფლებაში მოსვლამდე.

გიორგი შანიძის მიმართ გამოტანილი განაჩენი კიდევ ერთხელ გვაჩვენებს, თუ რამდენად უსამართლოა ქართული სისხლის სამართლის სისტემა და როგორ მანიპულირებს პოლიტიკური ხელისუფლება მისით. სამწუხაროა, რომ „სამართლიანობის აღდგენის“ დაპირებით მოსულმა პოლიტიკურმა ძალამ, არათუ მოახერხა დამოუკიდებელი და სამართლიანი მართლმსაჯულების სისტემის შექმნა, არამედ სრულყოფილად გადაიფორმა ის ყველა თავისი მანკიერებით და განაგრძო უკვე მისთვის არასასურველი პირებისთვის ამ სისტემის გამოყენება.

გაზიარება