სოციალური სამართლიანობის ცენტრმა, ევროკავშირის მხარდაჭერით, გამართა დისკუსია საქართველოს უსაფრთხოების სექტორში საჯარო ინფორმაციის ხელმისაწვდომობის შესახებ.

საქართველოს უსაფრთხოების სექტორში საჯარო ინფორმაციის ხელმისაწვდომობის საკითხის ანალიზის შედეგად, სოციალური სამართლიანობის ცენტრი რამდენიმე დასკვნამდე მივიდა:

• სახელმწიფო უწყებების ანგარიშვალდებულების ხარისხი გაუარესდა. გამოიკვეთა ისეთი ტენდენცია, როგორიცაა უწყებების მიერ ინფორმაციაზე წვდომის შეზღუდვის საფუძვლების გაფართოება, მათ შორის ცალსახად სტატისტიკური მონაცემების მოქცევა სახელმწიფო საიდუმლოების შემცველ ინფორმაციათა კატეგორიაში.
• სახელმწიფო უწყებები მნიშვნელოვნად არღვევენ საჯარო ინფორმაციის მიწოდების კანონით დადგენილ ვადას.
• საჯარო ინფორმაციის კანონმდებლობის შესაბამისად მიწოდების შემთხვევებშიც კი, მიღებული ინფორმაცია სათანადოდ არ პასუხობს სახელმწიფო უწყებებისადმი დასმულ კითხვებს.
• საჯარო ინფორმაციის მოთხოვნაზე უარის მიღების შემთხვევებში, არ არსებობს დარღვევის წინააღმდეგ რეაგირების ეფექტიანი საშუალება, რადგან ადმინისტრაციულ ორგანოებსა და სასამართლოებში სამართალწარმოება პრაქტიკაში არაეფექტურია.

სოციალური სამართლიანობის ცენტრის წარმომადგენლებმა, თამარ ფაჩულიამ და თამთა წვერაიძემ, წარმოადგინეს სახელმწიფო უწყებების ანგარიშვალდებულების გაუარესებასთან დაკავშირებით ორგანიზაციის მიერ ჩატარებული ანალიზის შედეგები. მათ განიხილეს ისეთი საკითხები, როგორებიცაა: საჯარო ინფორმაციის დაუსაბუთებელი შეზღუდვა; დასაიდუმლოების პრაქტიკა  და ადმინისტრაციულ ორგანოებსა და სასამართლოებში საჩივრის წარმოების სირთულეები.

ინფორმაციის თავისუფლების განვითარების ინსტიტუტის (IDFI) კანონის უზენაესობისა და მედიის თავისუფლების მიმართულების ხელმძღვანელმა, გიორგი დავითურმა, მიმოიხილა ორგანიზაციის მიერ მომზადებული უახლესი ანგარიში, რომლის მიხედვითაც ინფორმაციის ხელმისაწვდომობის ხარისხი მკვეთრად გაუარესებულია, კერძოდ, 2022 წელს საჯარო ინფორმაციის მოთხოვნაზე გამოხმაურების მაჩვენებელი 2010 წლის შემდეგ ყველაზე დაბალი - 58%-ია.

სახალხო დამცველის აპარატის წარმომადგენელმა თამარ გუგუტიშვილმა საჯარო ინფორმაციის მიღებაში აპარატის სახელმწიფო უწყებებთან თანამშრომლობის პრაქტიკაზე ისაუბრა. გარდა ამისა, მან ხაზი გაუსვა სახალხო დამცველის აპარატის მანდატსა და როლს მოქალაქეთა უფლების დაცვაში ინფორმაციის თავისუფლების მიმართულებით.

დისკუსია გაიმართა ევროკავშირის მხარდაჭერით, პროექტის „ანგარიშვალდებული და ადამიანის უფლებებზე ორიენტირებული უსაფრთხოების სექტორის მხარდაჭერა კვლევების, ადვოკატირებისა და ინკლუზიური დიალოგის გზით.“ პროექტი მიზნად ისახავს უსაფრთხოების სექტორზე ზედამხედველობის სისტემის გაუმჯობესებასა და უსაფრთხოების პრაქტიკაში ადამიანის უფლებათა დაცვის სტანდარტების ამაღლებას სიღრმისეული ანალიზის, ადვოკატირებისა და საზოგადოების ცნობიერების ამაღლების პროგრამების შეთავაზებით.