[Skip to Content]
ENG
ENG

სიახლეების გამოწერა

კრიტიკული პოლიტიკის პლატფორმა

                                                      

სოციალური სამართლიანობის ცენტრი აცხადებს მიღებას კრიტიკული პოლიტიკის პლატფორმის წევრების შესარჩევად. მონაწილეობის მიღება შეუძლიათ ახალგაზრდა აქტივისტებს და მკვლევრებს, რომლებსაც სურთ გაიღრმავონ ცოდნა ეკონომიკური, პოლიტიკური და კულტურული წესრიგის შესახებ, იფიქრონ უფრო სამართლიანი, ინკლუზიური და თანასწორი საზოგადოების შექმნის გზებზე და ჩაერთონ აქტივიზმში.

კონცეფცია

კრიტიკული პოლიტიკის პლატფორმა სოციალური სამართლიანობის ცენტრის მიერ ორგანიზებული აკადემიური და პოლიტიკური პლატფორმაა, რომელიც მიზნად ისახავს სოციალური სამართლიანობით, არსებული ეკონომიკური წესრიგის ანალიზით, ეკოლოგიით, ქვიარ და ფემინისტური პოლიტიკით დაინტერესებული ახალგაზრდა აქტივისტებისა და მკვლევარებისთვის კრიტიკული თეორიული ცოდნის გაღრმავებისა და კოლექტიური მსჯელობის სივრცის შექმნას. პლატფორმის ფოკუსს ასევე წარმოადგენს  მონაწილეების ურთიერთგაძლიერების, შეკავშირებისა და საერთო მოქმედების გზების ძიება.

კრიტიკული პოლიტიკის პლატფორმა საშუალებას მისცემს მონაწილეებს იფიქრონ და იმსჯელონ გლობალური და ადგილობრივი პოლიტიკური მდგომარეობის კონტექსტუალიზებაზე, სოციალური, ეკონომიკური და კულტურული კრიზისების გამომწვევ მიზეზებზე, გამოავლინონ და მოიხელთონ ძალაუფლების სხვადასხვა ღერძი და მჩაგვრელობითი წყარო, ეძიონ მჩაგვრელობით სისტემებთან შეწინააღმდეგების ხერხები. აქტივიზმის ადგილობრივი პრაქტიკები ხშირად ვერ ახერხებს ავთენტური, ინკლუზიური და სამართლიანი დღის წესრიგის შექმნას, რომელიც ადგილობრივ კონტექსტს და რეალურ საჭიროებებს დაეფუძნება. პლატფორმა მიზნად ისახავს ამ ხარვეზის შევსებას და ახალი ტიპის კრიტიკისა და მოქმედებების გაჩენის ხელშეწყობას.

კრიტიკული პოლიტიკის პლატფორმა

პლატფორმის ფარგლებში, წინასწარ მომზადებული სილაბუსის საფუძველზე, ჩატარდება 20 თეორიული ლექცია/დისკუსია სოციალური, პოლიტიკური და ჰუმანიტარული მეცნიერებებიდან, რომლებსაც გაუძღვებიან შესაბამისი გამოცდილების მქონე პირები აკადემიური სივრციდან და აქტივისტური წრეებიდან. პლატფორმის მონაწილეების საჭიროებების გათვალისწინებით, ასევე დაიგეგმება სემინარების ციკლი კოლექტიური მობილიზაციის, სოციალური ცვლილებებისთვის ბრძოლის სტრატეგიებსა და ინსტრუმენტებზე.

ფორმატი:

  • თეორიული ლექცია/დისკუსია
  • შერჩეული წიგნის/სტატიის კითხვის წრე
  • პრაქტიკული სემინარები (მობილიზაცია, ორგანიზება, მეთოდები და ინსტრუმენტები)

ტექნიკური დეტალები:

  • მონაწილეთა მაქსიმალური რაოდენობა: 15-20
    ლექციების რაოდენობა: 20 (თვეში 4)
    სალექციო დროის ხანგრძლივობა:  2 საათი
    ლექციათა ციკლის ხანგრძლივობა: 5 თვე (სექტემბერი-იანვარი)
    ლექციების ჩატარების ძირითადი ადგილი: შერეული (ეპიდემიოლოგიური მდგომარეობის გათვალისწინებით)

მონაწილეთა შერჩევა:

პლატფორმაში მონაწილეობის მსურველებმა უნდა შეავსონ სააპლიკაციო ფორმა 

სკოლაში მონაწილეობის შესაძლებლობა ექნებათ უმაღლესი განათლების მქონე (ან დამასრულებელ კურსზე მყოფ) 21 წლიდან 35 წლამდე ასაკის სტუდენტებს, ახალგაზრდა აქტივისტებსა და მკვლევრებს. პლატფორმის მონაწილეები უნდა დაესწრონ სალექციო საათების სულ მცირე 80%-ს.

კრიტიკული პოლიტიკის პლატფორმაში მონაწილეობის მისაღებად შევსებული სააპლიკაციო ფორმის გამოგზავნის ბოლო ვადაა 2021 წლის 16 სექტემბერი

სააპლიკაციო ფორმა გამოგზავნეთ შემდეგ მისამართზე:  [email protected] 

  • გთხოვთ, იმეილის subject ველში მიუთითოთ „კრიტიკული პოლიტიკის პლატფორმა“.

სოციალური სამართლიანობის ცენტრი დაუკავშირდება მხოლოდ შერჩეულ კანდიდატებს, რომლებიც გაივლიან კონკურსის შემდეგ ეტაპებს.

დამატებითი ინფორმაციისთვის ან კითხვების არსებობის შემთხვევაში შეგიძლიათ მოგვმართოთ:

კრიტიკული პოლიტიკის პლატფორმის ორგანიზება ხორციელდება სქესობრივი განათლების შვედური ასოციაციის (RFSU) ფინანსური მხარდაჭერით.

შრომის უფლება / განცხადება

სოციალური სამართლიანობის ცენტრი „თბილსსერვის ჯგუფის“ თანამშრომლის განთავისუფლება დისკრიმინაციის ნიშნებს შეიცავს

თბილისის დასუფთავების სამსახურის, „თბილსსერვის ჯგუფის“, თანამშრომლის, ირაკლი ბაღდავაძის, განთავისუფლება განსხვავებული აზრის საფუძველზე დისკრიმინაციის ნიშნებს შეიცავს. ირაკლი ბაღდავაძე მესამე დღეა „თბილსსერვის ჯგუფის“ შენობასთან შიმშილობს კომპანიაში დასაქმებულთა შრომითი პირობების გაუმჯობესებისა და სავარაუდო კორუფციის ფაქტებზე რეაგირების მოთხოვნით. სოციალური სამართლიანობის ცენტრი მნიშვნელოვნად მიიჩნევს, რომ „თბილსერვის ჯგუფმა“ ირაკლი ბაღდავაძეს სამართლიან მოთხოვნებს უპასუხოს და მისი განთავისუფლების დასაბუთება დროულად წარმოადგინოს წერილობითი ფორმით.

თავდაპირველი პროტესტის შემდეგ ბაღდავაძე განთავისუფლების რისკზე უკვე საუბრობდა და სოციალური სამართლიანობის ცენტრს სამართლებრივი დახმარების თხოვნით დაუკავშირდა. საბოლოოდ, 23 აგვისტოს „თბილსსერვის ჯგუფის“ ხელმძღვანელის გადაწყვეტილებით ირაკლი ბაღდავაძე სამსახურიდან გაანთავისუფლეს. ამას წინ უძღოდა შაბათს, 21 აგვისტოს, „თბილსერვის ჯგუფის“ მონიტორინგის სამსახურის მიერ ჩატარებული მოკვლევა ირაკლი ბაღდავაძის თანამშრომლებთან დაპირისპირებისა და კონფლიქტური სიტუაციების შექმნის შესახებ. სხდომის მიმდინარეობისას ირაკლი ბაღდავაძე უარყოფდა კონფლიქტს სხვა დასაქმებულებთან და „თბილსერვის ჯგუფს“ ამ დაპირისპირების ინსცენირებაში ადანაშაულებდა.

სხდომის მიმდინარეობისას „თბილსერვის ჯგუფის“ წარმომადგენელი ირაკლი ბაღდავაძის მიმართ აგრესიულად იყო განწყობილი და ირაკლი ბაღდავაძის შეფასებით არასამთავრობო ორგანიზაციის წარმომადგენლობის გარეშე სხდომა აუცილებლად შანტაჟის, შევიწროვებისა და მუქარის ფონზე წარიმართებოდა. საგულისხმოა, რომ როგორც ჩვენი ორგანიზაციისთვის, ისე ირაკლი ბაღდავაძისათვის ამ დრომდე უცნობია მონიტორინგის სამსახურის მოკვლევის შედეგები. ასევე არ არსებობს წერილობითი დასაბუთება ირაკლი ბაღდავაძის განთავისუფლების შესახებ, რის გამოც ის ახლა პროტესტის უკიდურესი ფორმით მოითხოვს, რომ წერილობით ჩაჰბარდეს განთავისუფლების დასაბუთება.

ირაკლი ბაღდავაძის თქმით, განთავისუფლების შემდეგ მას პერსონალური ინფორმაციის გამოქვეყნებით ემუქრებიან, ხოლო მედიაში დამატებით ვრცელდება ინფორმაცია ირაკლის პირადი ცხოვრების ამსახველი კადრების გავრცელებით განხორციელებულ შანტაჟზე. სოციალური სამართლიანობის ცენტრი მიიჩნევს, რომ აღნიშნული დამატებითი შესწავლისა და გამოძიების საგანი უნდა გახდეს.

საზოგადოებისთვის ცნობილია, რომ მიმდინარე წლის 6 აგვისტოს „თბილსერვის ჯგუფის“ თანამშრომლები გაიფიცნენ. დასაქმებულების მოთხოვნას სამუშაო პირობების გაუმჯობესება, სახელფასო ანაზღაურების გაზრდა და უსაფრთხო სამუშაო გარემოთი უზრუნველყოფა წარმოადგენდა. დასაქმებულები მიუთითებდნენ, რომ მათი ადეკვატური სამუშაო ეკიპირება არ ხდებოდა, მიუხედავად იმისა, რომ ხელშეკრულებების მიხედვით ისინი ზამთრისა და ზაფხულის სამუშაო ტანსაცმლით, ფეხსაცმლით და ხელთათმანებით უნდა ყოფილიყვნენ უზრუნველყოფილები. საგულისხმოა, რომ „თბილსერვის ჯგუფი“ შრომის ინსპექციის მიერ 2020 წლის ოქტომბერში შემოწმდა და მას 14 დარღვევა დაუდგინა, რომელთა უმეტესობაც შრომის პირობებისა და უსაფრთხოების წესების დარღვევას უკავშირდებოდა. თბილისის მერიის გაკეთებული განცხადებების მიხედვით სახელფასო ცვლილებები 2022 წლის იანვრიდან ამოქმედდება, სპეცტექნიკის შესყიდვა კი ევროპის რეკონსტრუქციისა და განვითარების ბანკის დახმარებით უახლოეს მომავალში განხორციელდება.

სოციალური სამართლიანობის ცენტრი „თბილსერვის ჯგუფს“ მოუწოდებს დაუყოვნებლივ ჩააბაროს ირაკლი ბაღდავაძეს განთავისუფლების დასაბუთება. საქმის გარემოებების სრულად შესწავლისა და გამოკვლევის შემდეგ სოციალური სამართლიანობის ცენტრი ირაკლი ბაღდავაძის ინტერესების დაცვის სტრატეგიას განსაზღვრავს, რის თაობაზეც დამატებით ვაცნობებთ საზოგადოებას.

ამასთან, მოვუწოდებთ შრომის ინსპექციის სამსახურს, უზრუნველყოს პერიოდული მონიტორინგის ჩატარება, დასუფთავების სამსახურში სამუშაო ადგილების უსაფრთხოების შემოწმებისა და დასაქმებულთა ჯანსაღი სამუშაო გარემოს უზრუნველყოფის მიზნით.

ინსტრუქცია

  • საიტზე წინ მოძრაობისთვის უნდა გამოიყენოთ ღილაკი „tab“
  • უკან დასაბრუნებლად გამოიყენება ღილაკები „shift+tab“